Friday, November 28, 2014

അടയാള വാക്കുകള്‍

നിന്നിലേക്കുള്ള
അടയാള വാക്കുകള്‍
മറവിയുടെ ആഴങ്ങളിലേക്ക്
ഇനി ഉപേക്ഷിക്കയാണ്

മൌനത്തിന്‍റെ
രുചി ഭേദങ്ങളില്‍ നിന്നും
നിന്നിലേക്കെത്തിച്ചേരാന്‍
ഇഷ്ടങ്ങളും
സമവാക്യങ്ങളും
ചോദിച്ചറിഞ്ഞ്
ആരോരുമറിയാതെ
നിനക്കായി മാത്രം
കൊരുത്തു വച്ച
അടയാളവാക്കുകള്‍

ഒറ്റയില പൊട്ടായി
നെഞ്ചിനുള്ളില്‍ ചേര്‍ത്ത്
വിശുദ്ധിയുടെ മിന്നുന്ന
സ്നേഹകുപ്പായമണിയിച്ച്
ചിതറി പോകുന്ന
മഴകൂട്ടത്തിനും
വഴുതി വീഴുന്ന
മിഴിനീരിനും
കടം നല്‍കാതെ
വെള്ള കടലാസില്‍
എഴുതി വയ്ക്കാതെ
കാത്തു വച്ച
അടയാളവാക്കുകള്‍

ഓര്‍മ്മകളില്‍ പൂക്കുന്ന
സമയ മണികള്‍
വിലപിക്കാത്ത
വേനലിലേക്ക്
നീരുവറ്റി പോയ
പൂക്കളിലേക്ക്
പാതിയോളം വന്നെത്തി
മുറിഞ്ഞു പോകുന്ന
ഉപ്പു തിരകളിലേക്ക്
ഇനി അടയാളവാക്കുകള്‍
ഉപേക്ഷിക്കയാണ്

1 comment:

സൗഗന്ധികം said...

അടയാള വാക്യങ്ങളുടെ കാവ്യം

നല്ല കവിത

ശുഭാശംസകൾ......







എന്‍റെ പെണ്ണേ......,

പെണ്ണേ , ഇത് ഇരുളാണ് ... നിലാപുതപ്പും ചൂടി ഈ ഇരുൾക്കാട്ടിലൂടെ നിന്റെ കരം കോർത്ത് എനിക്കേറെ ദൂരം സഞ്ചരിക്കേണ്ടതുണ്ട്... പെണ്ണേ , ...